Barbón afita 25 oxetivos pa 2025 que fadrán que'l cambéu "siga alantre" n'Asturies

El presidente asegura que l'añu 2025 sedrá l'añu de la vivienda nel Principáu

El presidente del Principáu, Adrián Barbón, afirmó que 2025 sedrá un añu nel que’l "cambéu siguirá alantre" na comunidá al traviés de la execución d’una serie de compromisos centraos na apuesta pola vivienda, la innovación pal retu demográficu, l’impulsu de la cultura sidrera, la modernización sanitaria, el sofitu a la nueva economía verde o’l fomentu d’una movilidá sostenible.

Asina lo aseguró esti llunes nuna rueda de prensa na que presentó los venticinco compromisos alquiríos pol Executivu d’alianza, formáu pol PSOE y IX-Convocatoria por Asturies, pal añu viniente.

Mandatu estable

Dempués de roblar la llei de presupuestos rexonales, Barbón solliñó que l’aprobación de les sos sestes cuentes como xefe del Executivu, que cuntaron col sofitu de la diputada del grupu mistu Covadonga Tomé a la que agradeció’l so sofitu, dexará poner en marcha una batería d’actuaciones que beneficiarán a la comunidá.

"Gracies a los presupuestos, que nos dexarán executar estes midíes, el cambéu sigue alantre. Los 6.664 millones son el meyor exemplu de lo que significa l’apuesta pola estabilidá", apuntó’l presidente.

Al rodiu d’esto, llamentó l’actitú de les fuerces polítiques que votaron a la escontra y que "ficieron tolo que taba nes sos manes" pa que nun salieren alantre col envís de qu’Asturies "se parare" y vaya "al ralentí" l’añu viniente.

Compromisos realizables pa 2025

El presidente esgranó los oxetivos "concretos, realizables y evaluables" que’l Gobiernu impulsará en 2025, como la puesta en marcha de la Oficina Económica y de la ventaniella única de suelu industrial pa l’atracción d’inversiones.

Dempués de destacar les meyores nes deducciones de la "vía fiscal asturiana" que pondrán aplicase na campaña viniente de la renta, Barbón comprometióse a presentar nel primer trimestre, y desendolcar, en tol exerciciu, un programa pluriañal d’acciones de caltenimientu y promoción de la cultura sidrera.

Coincidiendo col cuarenta aniversariu del lema 'Asturies, paraísu natural', reforzaráse la inversión en turismu rural, con una dotación global de 1,7 millones; crearáse’l Centru d’Innovación Territorial que valdrá d’acompañamientu a proyectos innovadores en conceyos en riesgu de despoblamientu; y llanzaráse la plataforma 'MiPrincipado' pa meyorar la prestación de servicios y los tiempos de rempuesta a la ciudadanía y les empreses.

La vivienda, apuesta prioritaria

Ún de los principales compromisos del Gobiernu del Principáu ye la puesta en marcha del programa 'Alquilámoste', diseñáu pa movilizar el parque priváu de vivienda, nel que l’alministración actuará como garante, y la negociación del pactu social por una vivienda pública, accesible y asequible qu’implique a alministraciones, sindicatos y empresariáu, asina como la llicitación de 400 nueves viviendes.